ပြည်ထောင်စုဝန်ကြီးဒုတိယဗိုလ်ချုပ်ကြီးရဲအောင် ချင်းပြည်နယ်မြို့နယ်များရှိ ဒေသဖွံ့ဖြိုးရေး လုပ်ငန်းများ ကြည့်ရှုစစ်ဆေး

by Thinmbadm1n / Dec 24, 2018 / comments

နေပြည်တော်၊ ဒီဇင်ဘာလ  ၂၃ ရက်

   နယ်စပ်ရေးရာဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ရဲအောင်၊ ချင်းပြည်နယ် ဝန်ကြီးချုပ် ဦးဆလိုင်းလျန်လွယ်၊ ချင်းပြည်နယ် လုံခြုံရေး နှင့် နယ်စပ်ရေးရာဝန်ကြီး ဗိုလ်မှူးကြီးဟန်ဝင်းအောင်နှင့်အဖွဲ့သည် ဒီဇင်ဘာလ (၂၁) ရက် မှ (၂၃) ရက်အထိ ချင်းပြည်နယ် အတွင်းရှိ ဖလမ်းမြို့နယ်၊ ထန်တလန်မြို့နယ် နှင့် ဟားခါးမြို့နယ်များသို့ သွားရောက်၍ ဒေသဖွံ့ဖြိုးရေးလုပ်ငန်းများအား ကြည့်ရှုစစ်ဆေးခဲ့သည်။

       ဒီဇင်ဘာ (၂၁) ရက်တွင် ဖလမ်းမြို့နယ်အတွင်း ၂၀၁၆-၂၀၁၇ ဘဏ္ဍာရေးနှစ်မှ စတင်အကောင်အထည်ဖော်ဆောင်ရွက်လျှက်ရှိသော အိုင်ကွန် - အိုင်ရ်ဘွာလ်- ကြောင်ဟွေ့- ကော့ဆဲ မြေလမ်း (၃၉/၀)မိုင် လုပ်ငန်းခွင်သို့ ရောက်ရှိခဲ့ပြီး ပြည်ထောင်စုဝန်ကြီးမှ လမ်းအရည်အသွေး ကောင်းမွန်စေရေး၊ သတ်မှတ်စံချိန်စံညွှန်းနှင့်အညီ စေတနာထား ကြိုးပမ်းအကောင်အထည်ဖော် ဆောင်ရွက်သွားရန် လမ်းညွှန်မှာကြား၍ လမ်းကြောင်းတစ်လျှောက် မော်တော်ယာဉ်ဖြင့်လှည့်လည်ကြည့်ရှုစစ်ဆေးခဲ့ပါသည်။

         ထို့နောက် ဖလမ်းမြို့သို့ ရောက်ရှိခဲ့ပြီး ဒေသခံမြို့မိမြို့ဖများနှင့်တွေ့ဆုံသည်။

          ပြည်ထောင်စုဝန်ကြီးသည် ဒီဇင်ဘာလ(၂၂)ရက်တွင်  ထန်တလန်မြို့နယ် သီကီရ်(ခ) ကျေးရွာသို့ ရောက်ရှိခဲ့ပြီး နယ်စပ်ရေးရာဝန်ကြီးဌာန ရန်ပုံငွေဖြင့် ဆောင်ရွက်နေသော သီကီရ်-သဘာဝဥယျာဉ်သွားလမ်း မြေလမ်း (၁၃/၄)မိုင်အနက် ဆောင်ရွက်ပြီးစီးခဲ့သော မြေလမ်း(၆/၄)မိုင်ကို ကြည့်ရှုစစ်ဆေးသည်။

     ထို့နောက် သီကီရ်ကျေးရွာတွင် ဆောင်ရွက်နေသော တည်ဆောက်ရေးလုပ်ငန်းများကို   လှည့်လည်ကြည့်ရှု့စစ်ဆေးခဲ့ပြီး သီကီရ်ကျေးရွာ တိုးချဲ့တည်ဆောက်ရေးအတွက် လမ်း၊ ရေ၊ တန်ဖိုးနည်းအိမ်ရာ တည်ဆောက်ရေးဆိုင်ရာ  ကိစ္စရပ်များ     ညှိနှိုင်းပေါင်းစပ် ဖြည့်ဆည်း ပေးခဲ့သည်။ ဆက်လက်၍ ပြည်ထောင်စုဝန်ကြီးနှင့်အဖွဲ့သည် စိုက်ပျိုးရေး၊ မွေးမြူးရေးနှင့် ဆည်မြောင်းဝန်ကြီးဌာန လက်အောက်ရှိ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန၊ တည်ဆောက်ရေး(၃)မှ တာဝန်ယူ တည်ဆောက်ပြီးစီးခဲ့သော သီကီရ်ရေလှောင်တမံသို့ သွားရောက်ကြည့်ရှုခဲ့ပြီး အဆိုပါ ရေလှောင်တမံမှ သီကီရ်ဒေသ အတွင်းရှိ ကျေးရွာ (၁၁) ရွာ ရေပေးဝေရေးကိစ္စရပ်များအပေါ် မှာကြားခဲ့သည်။

        ဒီဇင်ဘာလ (၂၃) ရက်နေ့ နံနက်ပိုင်းတွင် ဟားခါးမြို့မှတစ်ဆင့် ဝေဘူလမြို့သို့ ရောက်ရှိခဲ့ပြီး ဒေသခံမြို့မိ/မြို့ဖများနှင့် တွေ့ဆုံသည်။

     နယ်စပ်ရေးရာဝန်ကြီးဌာနအနေဖြင့်  ဖလမ်းမြို့နယ်အတွင်းရှိ  ကျေးရွာပေါင်း (၁၃)ရွာကို အကျိုးပြုမည့် အရှည် (၃၉/၀) မိုင်ရှိ အိုင်ကွန်- အိုင်ဘွာလ်-ကြောင်ဟွေ့-ကောဆဲ လမ်းကို ၂၀၁၆-၂၀၁၇ ဘဏ္ဍာရေးနှစ်တွင် မြေလမ်း(၁၃/၀)မိုင်၊ ၂၀၁၇-၂၀၁၈ ဘဏ္ဍာရေးနှစ်တွင် မြေလမ်း (၁၃/၀) မိုင် နှင့် ၂၀၁၈-၂၀၁၉ ပထမ (၆) လဘဏ္ဍာနှစ်တွင် မြေလမ်း (၂/၀) မိုင် စုစုပေါင်းလမ်းမိုင် (၂၈/၀)မိုင် ဖောက်လုပ်ပြီးစီးခဲ့ပြီး၂၀၁၈-၂၀၁၉ ဒုတိယ(၁၂) လ ဘဏ္ဍာနှစ်တွင် မြေလမ်း (၅/၀) မိုင် နှင့်ကျန်ရှိသည့် မြေလမ်း (၆/၀) မိုင်တို့ကို ဆက်လက်ဆောင်ရွက်သွားမည် ဖြစ်ကြောင်း သတင်းရရှိသည်။