ပြည်ထောင်စုဝန်ကြီး ဒုတိယဗိုလ်ချုပ်ကြီး ရဲအောင် ရခိုင်ပြည်နယ်အတွင်းရှိ ဒေသဖွံ့ဖြိုးရေးလုပ်ငန်းများ ကွင်းဆင်းကြည့်ရှုစစ်ဆေး

by Thinmbadm1n / Dec 01, 2018 / comments

နေပြည်တော်၊ဒီဇင်ဘာလ ၃၀ ရက်

        နယ်စပ်ရေးရာဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ရဲအောင်သည် တာဝန်ရှိသူများလိုက်ပါလျက် (၂၉-၁၁-၂၀၁၈) နေ့လည်ပိုင်းတွင် စစ်တွေမြို့သို့ ရောက်ရှိခဲ့ရာ ရခိုင်ပြည်နယ်ဝန်ကြီးချုပ် ဦးညီပု၊ လုံခြုံရေး နှင့် နယ်စပ်ရေးရာဝန်ကြီး ဗိုလ်မှူးကြီး ဖုန်းတင့် ၊ ဌာနဆိုင်ရာ တာဝန်ရှိသူများနှင့်  လေဆိပ်ခန်းမဆောင်၌  တွေ့ဆုံ၍ ရခိုင်နယ်မြေဒေသဖွံ့ဖြိုး တိုးတက်ရေး၊ လူ့စွမ်းအားအရင်းမြစ်ဖွံ့ဖြိုး တိုးတက်ရေး၊ လမ်းတံတားဖောက်လုပ်မှု လုပ်ငန်းများနှင့် တန်ဖိုးနည်း အိမ်ရာတည်ဆောက်မှု လုပ်ငန်းများအား ထပ်မံဆောင်ရွက်နိုင်ရေးကိစ္စရပ်များအား ညှိနှိုင်းဆွေးနွေး ခဲ့သည်။

   ဆက်လက်၍ပြည်ထောင်စုဝန်ကြီးနှင့်အဖွဲ့သည် မောင်တောမြို့နယ် ကျောက်ပန္ဒူသို့ ရောက်ရှိ ၍ နယ်စပ်ရေးရာဝန်ကြီးဌာနမှ တာဝန်ယူဆောက်လုပ်ပြီးစီးခဲ့သည့် တန်ဖိုးနည်းအိမ်ရာ (၁၀၀)လုံး ကိုကြည့်ရှုစစ်ဆေးခဲ့ပြီးဒေသခံတိုင်းရင်းသားများနေရာချထားပေးနိုင်ရေးအတွက် ပြည်နယ်အစိုးရအဖွဲ့ ထံ လွှဲပြောင်းပေးအပ်ခဲ့ကာ ပြည်နယ်အစိုးရနှင့်ဒေသခံများ တင်ပြချက်အပေါ်  ညှိနှိုင်းဖြည့်ဆည်း ပေးခဲ့သည်။

   ထို့နောက်ပြည်ထောင်စုဝန်ကြီးသည်  ၂၀၁၂-၂၀၁၃ခုနှစ် ရန်ပုံငွေဖြင့် ဆောင်ရွက်ပြီးစီးခဲ့သည့် မောင်တော- ဝေသာလီ- ဥဒေါင်းကွန်ကရစ်လမ်း(၁၃/၀)မိုင် လမ်းနှင့် အေးရှားဝေါလ် ကုမ္ပဏီမှ ဆောင်ရွက်လျက်ရှိသည့် အငူမော်- အင်းဒင်- ကျောက်ပန္ဒူ- ဥဒေါင်း ကွန်ကရစ်လမ်းအား စက်ယန္တရားကြီးများဖြင့် ဖောက်လုပ်နေမှုအခြေအနေအား ကြည့်ရှုစစ်ဆေးခဲ့ပြီး လိုအပ်သည်များ ပေါင်းစပ်ညှိနှိုင်းပေးခဲ့သည်။     

    ညနေပိုင်းတွင်ပြည်ထောင်စုဝန်ကြီးနှင့်အဖွဲ့သည် ၂၀၁၈-၂၀၁၉ဘဏ္ဍာနှစ် ပထမ(၆)လပတ် ခွင့်ပြုရန်ပုံငွေဖြင့် ဆောင်ရွက်ပြီးစီးခဲ့သည့် ရွှေဇား-ပြင်ဖြူကွန်ကရစ်လမ်း(၁/၃)မိုင်သို့ ရောက်ရှိ စစ်ဆေးခဲ့ပြီး ရှင်းလင်းဆောင်၌ တာဝန်ခံအင်ဂျင်နီယာမှ လမ်းဖောက်လုပ်ထားရှိမှု အခြေအနေ ရှင်းလင်းတင်ပြချက် အပေါ် ပြည်ထောင်စုဝန်ကြီးက လိုအပ်သည်များ မှာကြားခဲ့သည်။

          ပြည်ထောင်စုဝန်ကြီးသည် ပြင်ဖြူ- လှဖိုးခေါင်- ကျီးကန်းပြင် ကျောက်ချောလမ်း ပြုပြင် ဆောင်ရွက်ပြီးစီးမှုအခြေအနေများအား ဆက်လက် ကြည့်ရှုစစ်ဆေးခဲ့သည်။

   ပြည်ထောင်စုဝန်ကြီးနှင့်အဖွဲ့သည်(၃၀-၁၁-၂၀၁၈)ရက်နေ့ နံနက်ပိုင်းတွင် ဘူးသီးတောင်- တောင်ပဇာလမ်းပိုင်းသို့ သွားရောက်၍ လမ်းရေရှည်တည်တံ့ခိုင်မြဲရန်အတွက် လိုအပ်သည့် ပြုပြင် ထိန်းသိမ်းခြင်းလုပ်ငန်းများ ဆောင်ရွက်ပေးနိုင်ရန် ကြည့်ရှုစစ်ဆေးခဲ့သည်။

     ဆက်လက်၍ ဘူးသီးတောင်မြို့နယ်၊ တောင်ပဇာကျေးရွာရှိ  ၂၀၁၇-၂၀၁၈ဘဏ္ဍာနှစ် ရန်ပုံငွေဖြင့်ဆောင်ရွက်ပေးခဲ့သည့် တန်ဖိုးနည်းအိမ်ရာ(၆၃)လုံးတွင် နေရာချထားပြီးသော ဒေသခံ တိုင်းရင်းသား (မြို/သက်)များ အခြေတကျ နေထိုင်မှုများအား ကြည့်ရှုစစ်ဆေး၍ ဆိုလာမီးများ ထောက်ပံ့ ပေးအပ်ခဲ့ပြီး နေထိုင်သူများ၏ တင်ပြချက်များအပေါ် ညှိနှိုင်းဖြည့်ဆည်း ပေးခဲ့သည်။ 

      နေ့လည်ပိုင်းတွင် ပြည်ထောင်စုဝန်ကြီးသည် စစ်တွေမြို့နယ်ရှိ ပလ္လင်ပြင်- အောင်ဒိုင်- ကျက်တောပြင် ကွန်ကရစ်လမ်း(၃/၁)မိုင် ဆောင်ရွက်ပြီးစီးမှုအား လည်းကောင်း၊ ၂၀၁၈-၂၀၁၉ ဘဏ္ဍာနှစ်ရန်ပုံငွေဖြင့် ဆောင်ရွက်မည့် ရွှေမင်းဂံလမ်းဆုံမှကံ့ကော်ကျွန်း-ရွာသစ်ကေ မြေသားလမ်း (၃/၁)မိုင်ဖောက်လုပ်မည့် လုပ်ငန်းအားလည်းကောင်း ကြည့်ရှုစစ်ဆေးခဲ့ပြီး လိုအပ်သည်များ ပေါင်းစပ်ညှိနှိုင်းပေးခဲ့သည်။

  နယ်စပ်ရေးရာဝန်ကြီးဌာနအနေဖြင့် နယ်စပ်ဒေသတိုင်းရင်းသား ဖွံ့ဖြိုးရေးလုပ်ငန်းများ ဖြစ်သော လမ်း/တံတား၊ စိုက်ပျိုးရေ/သောက်သုံးရေရရှိရေး၊ ပညာရေး၊ ကျန်းမာရေး၊ ဘာသာရေး ဆိုင်ရာများ၊ဆိုလာမီးများနှင့်တန်ဖိုးနည်းအိမ်ရာများ ဆောင်ရွက်ပေးလျက်ရှိရာ ရခိုင်ပြည်နယ်အတွင်း ဒေသခံတိုင်းရင်းသားများအတွက် နေအိမ်ဆောက်လုပ်ပေးခြင်းလုပ်ငန်း များကို  မောင်တောမြို့နယ် ရှိ ရွှေဗဟိုကျေးရွာတွင်နေအိမ်(၅၀)လုံး၊ ကျောက်ပန္ဒူကျေးရွာတွင် နေအိမ်(၁၀၀)လုံး၊ နန်းရာကိုင်း ကျေးရွာတွင် နေအိမ်(၅၀)လုံး၊ ခုံတိုင်ကျေးရွာတွင် နေအိမ်(၁၈)လုံး၊ ဘူးသီးတောင်မြို့နယ်၌ တောင်ပဇာကျေးရွာတွင် နေအိမ်(၆၃)လုံး၊ ရသေ့တောင်မြို့နယ်အတွင်း အဝတာကျေးရွာတွင် နေအိမ် (၄၆)လုံးတို့ကို နှစ်အလိုက် ဆောင်ရွက်ပေးခဲ့ပြီး နောင်ဘဏ္ဍာနှစ်များတွင် လိုအပ်ချက်ရှိသည့် ကျေးရွာများအား ဆက်လက်ဆောင်ရွက်ပေးသွားမည်ဖြစ်ကြောင်း သတင်းရရှိသည်။