စစ်ကိုင်းတိုင်းဒေသကြီး၊ ကလေးဝမြို့နယ်အတွင်း တိုင်းဒေသကြီး/ပြည်နယ်အစိုးရအဖွဲ့၏ ခွင့်ပြုရန်ပုံငွေ၊ တာဝန်ခံ ကြီးကြပ်ကွပ်ကဲမှုဖြင့် နယ်စပ်ဒေသဖွံ့ဖြိုးရေး ကြိုးတံတားတစ်စင်း ချောင်းရေတိုက်စားမှုကြောင့် ပျက်စီးမှုအား သတင်းမှန် ထုတ်ပြန်ခြင်း

by Thinmbadm1n / Jul 31, 2017 / comments

၂၀၁၇ ခုနှစ် ဇူလိုင်လ ၃၁ ရက်

          စစ်ကိုင်းတိုင်းဒေသကြီး၊ ကလေးဝမြို့နယ်၊ မိုးကောင်းချောင်းနှင့် နန်းပင်ချောင်းနှစ်ခုဆုံရာတွင် ခွင့်ပြုရန်ပုံငွေကျပ် (၁၀၅၉) သိန်းဖြင့် တည်ဆောက်ခဲ့သော အင်ဒုတ်ကြိုးတံတားမှာ ဇူလိုင်လ (၂၈) ရက် ညပိုင်းက ချောင်းရေတိုက်စားမှုကြောင့် ပျက်စီးခဲ့ကြောင်းနှင့် အဆိုပါတံတားမှာ နယ်စပ်ရေးရာဝန်ကြီး ဌာနမှ ဆောင်ရွက်ခဲ့သော တံတားဖြစ်ကြောင်း Social Media Facebook တွင် ပျံ့နှံ့လျက်ရှိပါသည်။

          နယ်စပ်ဒေသဖွံ့ဖြိုးရေးလုပ်ငန်းများ ဆောင်ရွက်ရာတွင် ပြည်ထောင်စုရန်ပုံငွေဖြင့် နယ်စပ်ရေးရာ ဝန်ကြီးဌာနမှ တာဝန်ခံ ကြီးကြပ်ဆောင်ရွက်သော နယ်စပ်ဒေသဖွံ့ဖြိုးရေးလုပ်ငန်းများ ရှိသကဲ့သို့ သက်ဆိုင်ရာတိုင်းဒေသကြီး/ပြည်နယ်အစိုးရအဖွဲ့၏ ရန်ပုံငွေဖြင့်  သက်ဆိုင်ရာတိုင်းဒေသကြီး/ ပြည်နယ် အစိုးရအဖွဲ့များမှ တာဝန်ခံကြီးကြပ်ဆောင်ရွက်သော နယ်စပ်ဒေသဖွံ့ဖြိုးရေး လုပ်ငန်းများလည်း ရှိပါသည်။

          အဆိုပါ နယ်စပ်ဒေသဖွံ့ဖြိုးရေးလုပ်ငန်းများအား တည်ဆောက်ပြီးစီး၍ ကဗ္ဗည်းမော်ကွန်း ရေးထိုးဖော်ပြရာတွင် ပြည်ထောင်စုရန်ပုံငွေဖြင့် ဆောင်ရွက်သည်ဖြစ်စေ၊ တိုင်းဒေသကြီး/ပြည်နယ် ရန်ပုံငွေဖြင့် ဆောင်ရွက်သည်ဖြစ်စေ လုပ်ငန်းအားလုံးအပေါ် နယ်စပ်ဒေသဖွံ့ဖြိုးရေး Logo ကိုသာ တပ်ဆင် ရေးထိုးထားသဖြင့် ပြည်သူအများစုမှာ အဆိုပါ Logo ကို တွေ့ရှိပါက နယ်စပ်ရေးရာဝန်ကြီးဌာနမှ တာဝန်ခံ ဆောင်ရွက်သော နယ်စပ်ဒေသ ဖွံ့ဖြိုးတိုးတက်ရေးလုပ်ငန်း (နတလလုပ်ငန်း) ဟု အထင်အမြင်လွဲမှားလျက်ရှိကြောင်း တွေ့ရှိရပါသည်။

          လတ်တလော Social Media Facebook တွင် ပျံ့နှံ့လျက်ရှိသော စစ်ကိုင်းတိုင်းဒေသကြီး၊ ကလေးဝမြို့နယ်အတွင်း တည်ဆောက်ပြီး လေးလခန့်အကြာ ၂၀၁၇ ခုနှစ် ဇူလိုင်လ ၂၈ ရက်နေ့တွင် ချောင်းရေတိုက်စား၍ ပျက်စီးခဲ့သော အင်ဒုတ်ကြိုးတံတားမှာ နယ်စပ်ရေးရာဝန်ကြီးဌာနမှ တာဝန်ယူ ဆောင်ရွက်သော နယ်စပ်ဒေသဖွံ့ဖြိုးရေး လုပ်ငန်းမဟုတ်ပါကြောင်းနှင့် သက်ဆိုင်ရာ တိုင်းဒေသကြီး အစိုးရအဖွဲ့၏ ရန်ပုံငွေ၊ တိုင်းဒေသကြီးအစိုးရအဖွဲ့၏ တာဝန်ခံကြီးကြပ်ကွပ်ကဲမှုဖြင့် ဆောင်ရွက်ခဲ့သော လုပ်ငန်းသာဖြစ်ပါကြောင်း သတင်းမှန် ရှင်းလင်းဖော်ပြအပ်ပါသည်။